vnnd berawbt sie. die er aůch also mit aller hab. gein Freÿbůrg fůrt.
da wart erstochenn ein schreiber des konigs vonn Polnn der beÿ den wagen
reÿt. da man noch sein steÿnes krewtz sehenn mag. zů ainem zeichenn
diser geschicht. Nůn was diss in des Lantgraůen Landt vnnd glaÿt
gescheenn. Derhalbenn er die gefangenn mitsambt dem
gewůnnenn gůt wider fordert ÿm zůantworten. ee er sie selbst holet.
Daraůff sie dem Lantgraůenn stoltz vnnd snode antwort enbotenn.
sich aůff dess Slos Vestickait vertrostende. vnnd besůnderlich aůff die
rettůng der Sachssenn. vnd der zweÿer Bischoff von Magdebůrg vnd
von Mersbůrg. Darůmb belegt der Lanntgraff das Sloss
Freÿbůrg. vnnd gewan es. Totet sie nach dem rechtenn. vnd behielt das
Sloss fůr sich vnnd seine erbenn. Dise vnd vil andere
hochrůmliche Fůrstliche that verbracht diser Hochberůmbt Lantgraff
zů nůtz. hail. vnnd Frid seiner Lanndt vnnd lewth.

Darnach bawet diser Fůrst. In maÿnůng die Stat sein vnd seiner vorfarn,
begrebnÿs zůerhohenn zů der Aldenn zelle ein schone Capellen in die
Ere des hailigenn Apostell Sannt Anders. Da er mit sambt
seÿner Frawenn begrabenn ist wordenn.