Als diser důrchlaůcht Fůrst. Lanntgraff Fridrich Neůnvnddreÿssig Jhar alt
was wordenn. vnnd Cristlich gelebt vnnd loblich geregirt hett. starb er
an Sannt Elisabet tag. Nach cristi gebůrt Dreÿzehenhůndert vnnd
Im NeůnvnndViertzigsten Jharr.

Aůs beschribener antzaigůng des Lebens vnd der Loblichenn geschicht.
Dises hochgebornnenn Fůrsten. kan ein ÿeder verstendiger wol
abnemen das er darůmb der Ernst genant ist wordenn. das er mit
besůnderm Ernst hat die Rawber, morder vnnd beschediger seÿner
Lanndt vnd Lewth. vnd andere vbelteter gestrafft, vnd gerechtfertigt.