Da in vorzeitenn die Marck in Lawsatz verledigt. vnnd der Romisch Kaÿser
Lůdwig dieselb seinem Sůn Lůdwig gelihenn hett. vergůnten ÿm der ErtzBischof
von Magdebůrg. vnnd hertzog Rudolff von Sachssenn die Ere. Derhalbenn
sie nach abgang kaÿser Lůdwigs dieselben zwen Fůrsten einen múlner der dem
letzten verstorbenn Marggraůen enlich was. fůr denselben zů ainem Marggraůen
aůfwarffen. nenten. vnd mitsambt etlichen andern Fůrsten dafůr
hieldenn. vnd mit gewalt als den rechten Marggraůen. Wiewol der vor
Fůnffvndzweintzig Iharn gestorbenn was. einzůbringen. als wider lebendig
wordenn. vermeinten. Daraůs vil vbels erwůchs. vnd ein krieg acht
Ihar werendt. Alles aůf disen anslag das gnante Fůrsten hetten můgen.
dieselb marck an sich bringen. vnntereÿnander zůtailn. Entlich behielt
des kaÿsers Sůn die marck. vnd der můller starb zů Dessaw in grossem elendt