Diezeit wůrd zů zirenberg in der stat des Lanntgraůen zů hessenn Inn
aines bůrgers haws von vil menschen ein handt. gesehen vnd begriffenn.
Aber nichts mer. Wiewol ein stÿm wart gehort. als eines heyssern menschn.
Als es nůn befragt wart. wer es wer. Antwort es. Jch bin ein mensch.
vnd ein Cristlich mensch als dů. vnd zů Gottingenn getaůfft. vnd heÿs
Reÿneck. da es gefragt wart. ab es allein wer. Sagt es. Neÿn. Sůndernn
vnser ist ein mercklich antzal. Vnd essen. trincken. nemen weÿber. vnnd
zeůgenn kinder. als anndere Cristliche menschen. Seen aůch vnd schneÿden.
vnd thůn anndere menschliche arbeÿt. Diss thet aůch vil arbeÿt
vnd halff den lewten grossen dinst zů mancher arbeÿt.