Stat zůerobbernn. redt er sie an mit freůntlichenn vnd vernůfftigen worten
gar vleisig bitendt sich zůenthalden Ires fůrgenůmmen Ernsts. bis er wider
zů ÿn kem. Wann er wolt zů seinen herren vnd freůnden reÿten. sich mit ÿn
zůvnnterreden. vnd die Lůnenburgische Schlussell zů der Stat bringen Vnd die
ganntze Stat zůergeben. an alle gegenwer. vnd geredt yn wider beÿ ÿn zůerscheÿnen.
Also rÿt er vonn ÿn. vnd In mitler zeit zogenn die Bůrger yrn harnisch
an. vnnd als sie nůn fast gerůst warn. rÿt er wider zů den feynden seiner
zůsag nach. vnnd saget. Wie das sich die Bůrger in keÿn weg
woltenn geben. So baldt wůrden die feÿndt von den Bůrgern vmbfangen.
Vnd alle erslagen vnd gefangen. Etliche hůndert villeicht kamen in
der flůcht an der hailigen Eÿlfftaůsent Jůnckfraw kirchen.
Da erschynnen ÿn etlich vil taůsent gewappenter Iůnckfrawen. Daůor sie
alle erschrackenn das sie von stůndt vmbkarten. vnd den bůrgernn
zú handen kamen. vnnd aůch widr die andern erslagen vnd gefangen,
wůrdenn. Vnd nachdem Ir ser vil gefangen wůrden.
Vnnd also das man sie nicht alle kůnt In des Rats gefencknÿs enthaltn.
wůrden viln bůrgern. vnd beůor Ratsherrenn. befoln In ÿrn hewsern
zůhaltenn. bis man sie mocht nach erhaischůng des gemeÿnen nůtzes
beschaffenn. Von welchen etliche aůskamen. vnnd die
Stat Lůnenbůrg vnnd die ÿrn ser beschedigtenn. Dadůrch die
vonn Lůnenbůrg bewegt die hinder stellige gefangen die sie noch beÿ
ÿn hetten besser zůbewarnn. Damit sie ÿn nicht zů ÿrm nachtail
entwůrden. Also hett der Bůrgermaister oder Ratsherr ainer etlich
vil gefangen angenůmmen. vnd dieselben alle lassen in seinem hawss
enthawbten. vnd als er aůch wie die andern gefragt wart.
Wo vnd wie er sein gefangen bewart hett. Da antwort er. Er hett sie wol
bewart. Aber vnangetzeigt Wo. vnnd wie er sie behalten het. Also
wolt der Rath ÿe eigentlich wissen. wo er sie hett. In besorgůng er
wůrdt sie ledig gebenn. Daůon nicht weniger schadens mocht der Stat
dann von den andern entsteen. Als er nůn sah das er mocht verdechtig
werdenn. er meldet dann. wie er sie verwart het. Saget er. Lieben.
herren. Ir dorfft kein beforchtůng vonn ÿn habenn. Ich hab sie wol bewart.
Sie werden mir nicht entwerden. Vnd vnns ÿr kaÿner aynigen schaden
nymmer mer erzaigen. vnnd dess zů ainem warhafftigen zaichenn. sehendt
da sein ÿr kopff. die er alle behalten hett. Also
halff der Almechtig als vil meÿnen důrch vorbit der hailigen Eÿlftaůsent
Iůnckfrawen der Stat Lůnenbůrg aůs disem vnglůck, seliglichen.