Erstlich Hertzog Vlrichs vonn der weser tochter. die darnach geraweth.
das sie ein Graůen genůmmen hett. vnd hadert sich mit ÿm vmb den
Adell des geschlechts. Daraůff er ir antwort. keÿnen Adell oder gebůrt
nichts sein. wo er nicht mit tugenden getzirt wůrdt. Vnnd aůff das er
dester fridlicher mocht leben. schickt er sie ÿrem Vater wider heÿm. bis
er Ir mocht gůt gnúg werdenn. Derhalben sie vonn ÿrem Vaterr
hart gestrafft wart. vnd entlich darnach starb.

Zům anndern nam er Frawen Adelhaidenn Pfaltzgrefÿn zů Sachssen
Marggraůen Otto. vonn Staden tochter. Dann als er derselben Frawen
mit vnreÿner lieb anhieng. riet sie ÿm. den pfaltzgraůen ÿrn Herrenn zů
Schiplitz wonhafftig zůtoten. Vnd sie zů seinem weib zůnemenn.
Vnnd als er verwilligt. erdacht sie disen sÿnn. Er solt nahent beÿ Schiplitz.
verwapent Jagenn. So wolt sie ÿrn herrenn hinaůs bringen. damit
er mocht vonn ÿm erslagenn werden. Demnach als der pfaltzgraff
ein tag vonn kranckheÿt wegenn Im bad sas. kam Graff Lůdwig der Springer
mit etlichen pferden vnnd bliesen die horner gleich also Iagten sie.
Derhalbenn die Pfaltzgreůÿn ertzornet. warff ÿm fůr das er von lůst
wegen seins leibs die oberkait seÿner eÿgenschafft begeb vnnd verlůr. Daraůff
der frům herr bewegt. aůs dem bad gieng. ein mantel vmbnam. vnd aůff ein
pferd Sprang. Graůen Lúdwig nachfolget. vnd diser tathalbenn vbel
redt. Derhalben er vonn ÿm mit ainem spies důrchstochen wart. Vnd zů Gosck
begraben. Das er mit seinem brůder gestifft hett. Vnd an der Stat da
er ist erstochen worden. steen zwen Lateinisch Vers diser Teůtschen maÿnůng.
Hie wart erstochen vnredlich. Der Pfaltzgraff vonn Sachssen Friderich.
Vonn Graf Lůdwig mit eÿnem sper. Als er Iagenn reÿt daher.
Vnnd als solchs nach cristi gebůrt Taůsent vnd Im Viervnndsechtzigstenn Jar
gescheen. Nam Graff Ludwig benante Pfaltzgrefÿn. vnd erlangt vier Sůn mit ÿr.
Lůdwig. den Ersten Lantgraůen zů Důringen vnd hessen. hainrich. Raspe
der Raspenberg zům Erstenn gebawet hat. hermann. der Im gefencknÿs ist
gestorben. vnd Herrnn. Vdo. Bischoff zů Naůmbůrg.

Aůch Dreÿ tochterr.

Kůngůndt. ein Stiffterÿnn zů Caldenborn. Cecilien. ein Grefÿn
vonn Waldensee. Vnnd. Adelhait ein Grefÿn zů Weÿmarr.