Diser Lanntgraff hat gehabt zů seinem eelichenn gemahell Frawenn.
Katherina. vonn Hennenberg geborn. ein ser lobliche Fůrstÿn Vnd mit
ÿr Vier Sůn erlangt. Erstlich Lantgraff Fridrich der Jůng zů Rochlitz starb.
Dess sich dise frůmme Fůrstÿn so hoch bekůmmert, das sie gelobt hinfůr
Ir leb tag kain annder Farb dann schwartz zůtragen aůch kein hefftlen
oder ander claÿnat zůgebraůchen. Aber aůff vilfaltig Innig vorbit vmb mer
kinder begabt sie der Almechtig gnediglich mit dreÿen gar loblichn Fůrstn. die
sie darnach gebar. Hertzog. Fridrich. zu Sachssen den Ersten Cůrfůrstenn
Lanntgraff Wilhelm. vnnd Lantgraůenn. Georgenn.