Da wider die vonn Swartzbůrg des verstorbenn Graůen von Swartzbůrg
Vettern Sprachenn. Sie wern mit ÿrm Verstorbenn vettern In gesambten
Lehenn gesessenn. Derhalbenn kam die sach an den
Freÿenn stůl. Als man aber Lang vnnd vil weg. versúcht hett, Vnd gros kost
darůmb gethan. vnterfastenn die andernn Graůen vnd herrenn In
Důringn die sach. Ir Lanndt damit vnůerderbt zůvnter halten. Vnnd
teÿdingten freůntlich soůil das die Graůenn von Swartzbůrg soltn
den Lantgraůenn zů Důringn geben Dreÿtawsent marck lotiges silbers
mitsambt den dreÿenn Slossern Dornberg. Wintberg vnd Greiffenberg
Also behieltn die vonn Swartzbůrg Ir Lanndt vnůerderbt. Vnnd dieser
krieg wart. wie gemelt ist gericht.

Vor disenn zeitenn hetten die Lantgraůen von Důringen Kindelbrůcken.
Kindelbrůckenn vonn Graůen Herman von Beichlingn versatzt,
Welcher die arme Lewth. mit fronenn Vnnd dinst ser beschwert.
Vnd ÿn nach Cristi gebůrt Dreÿzehenhůndert vnnd Im NeůnvnndFůnffzcigstn.
Jhar wolt ein dinst aůfflegen. Den sie Inn kaÿn weg woltn
annemen. Sůndernn sich liessen vernemen. ee sie aůffgelegt.
gelt woltenn gebenn ee woltenn sie wenn es nicht geandert mocht werden.