das dorff lassenn vmbkern. Vnnd beclagtenn sich diser beswerůng gegen
den Lantgraůenn. Da diss der Graff vonn Beichlingn erfůr das die
von kindelbrůckenn vber ÿn geclagt hetten. wart er ser vber sie vnwillig.
Vnnd bat die vonn Erffůrdt. Můlhawsen vnnd Northawsen die ÿmser gnaigt
warnn. Vnnd vberfiel mit ÿrer hůlff das Stetlen. vnnd blůndert
es. Vnnd nachdem die einwoner zůr were kamenn. vnnd ÿn vil schadens am
geschůtz vnnd an pferden teten. wůrdt der Graff vonn Beichlingenn also
ertzornt das er kindelbrůckenn anstackt vnd awsbrant. Erslůg aůch
etlich Bawrn. vnd fůrt etlich gefangenn hinweg. Da diss die Lantgraůen
erfůrn. wolten sie den gedachtn Stetn entsagen. vnd dem Graůen vonn
Beichlingn. Derhalbenn darzwÿschenn wart geteÿdingt. das
dieselbenn Stete ein grosse sůmma gelds vmb vertrags willen můstn
den Lantgraůenn geben. Welchs dem Graůen aůch ains tails
wart gegeben. vnd das Stetlen kindelbrůck wart also von den Lantgraůen
wider gelost.

Der Apt zů Fülda die zeit was ein stoltzerr man vnd vbergab die
Fůrsten vmb ÿn gelegenn. Vnd thet den Lantgraůen zů Důringen
vnd Hessen vil schadens mit rawbereÿ aůs seÿnem Lanndt. Also verbůnden
sich die Lantgraůenn zů Důringn vnnd Hessenn zůsammen. Vnd zogenn