mit zweÿenn heer dem Apt vonn Fůlda in sein Landt. vnd verherten vnd
verderbtn alles das sie Inn dem Fůldischenn Landt ankamenn. Am
andernn tag legten sich die Hessen vor Rockenstůl In hůnfeldt. vnd
gewůnnen das mit gewalt. Vnd diser Lantgraff zů důringn
zog vor Geÿsa In ernster maÿnüng dasselb aůch zůerobbern.
Da nůn der Apt vonn Fůlda sah das die zwen mechtige Fůrsten zů Důringn
Vnnd Hessen mit solcher gewalt wider ÿn Im Feldt lagen. schickt er
zů ÿn sie aůffs demůtiglichst vnd důrch Got bitendt. das sie woltenn
des Stiffts verschonenn. mit erbietůng alles das er ÿe mit wortenn
oder werckenn wider sie gethan hett zůbůssen. Also wůrden die Fůrstn
zů erbarmůng bewegt. Vnnd namen ein Richtůng.

Nach Cristi gebürt Dreÿzehenhůndert vnd Im FůnffvnndSechzigstenn
Jhar rawbt vnnd beschedigt Hertzog Albrecht vonn Braůnsweig
den man nant von dem Saltz. Die Lantgraůen in Důringn vnd ÿr
man stetiglichenn wo er kůnt vnd mocht. Derwegen diser
Lantgraff Fridrich der Gestreng zů ÿm schicket ÿn dafůr bitendt sich