solchs an ÿm vnd den seinen zůenthalten. mit befragůng. warůmb er solch
vnfreůntlich fůrnemen vnůerůrsacht wider ÿn gebraůcht. Daraůff
der Hertzog von Braůnsweig vnglÿmpfich antwort gab. Nemlich er
wolt diss fůrnemens vmb seiner draw willen nicht lassen. Er wolt
sein Lanndt vnnd Slos vor ÿm wol behaltenn ab es gleich Lantgrafn
regent. Da das Lantgraff Fridrich mitsambt seinen brůdern vernam.
beslossen sie miteÿnander aůff benanten hertzogen zůziehen. Darůmb
machtn sie aůs ÿrn Landenn Folck. Erworben aůch beÿ den Steten
Erffůrdt Můlhawsen vnd Northawsen yn mechtiglich zůfolgen. Vnd zogen
mit Iren Graůen. Herren Steten vnnd Ritterschafft mit einem grossen
heer Nemlich mit Achtzehenntawsent man wider den hertzogen von Braůnsweig.
Aůch zog der Ertz Bischoff vonn Meintz den der vilgemelt hertzog
aůch beschedigt hett. den Lantgraůen zů. Vnd zogen dem Hertzogen mit
solcher gewalt In sein Landt. belegtn Saltz das Sloss vnd die Stat Einbeck
vnd verderbtn was darůmb was. Liessen aůch werck machenn die
man zů dem Slos treyben solt. Also het der hertzog ein pleÿern bůchssen aůff
dem Slos. vnd schos damit in das werck. Vnnd dis ist die
Erste bůchsse gewest als Etlich Cronicka meldenn. die In disen Landenn
ist gesehen wordenn.

Kůrtz darnach zogen die Lantgraůenn in Důringn zům andern mall.