seins Folcks vil erslagenn wart Aůch wůrden ÿm abgefangen mer dann
Achtzig gůte Ritter vnnd knecht. Vnnd herr Dittrich vonn Witzlewbenn
der sein Paner fůrt wart aůch erslagen. vnd der Graff entreit kaůmet,
Derhalbenn da er die gefangenn losen solt můst er die zweÿ Schloss
Wassenbůrg vnnd Schwartzenwalt mit ÿrer zůgehorůng den von Erffůrdt
verkawffen. Darůmb zogen die vonn Erffůrdt mit Graff Hansen von
Schwartzbůrg zů dem Romischen kaÿser die benanten Slosser in lehenn
zůentpfaenn. In dem fieng sie vnter wegen der Hertzog vonn Baÿrnn
vnnd nam ÿn all ÿr brieff die sie mit ÿn fůrtenn vnd Neůntawsent
gůldenn. Welchs alles den Lantgraůenn zů Důringenn zů
gůt vnnd lieb. Darnach gab der Hertzog den Graůenn
loss. mit diesem beschaid. das er den gedachten kawff den vonn Erffůrdt
widerziehen. vnnd dieselbenn zweÿ Slosserr den Lanntgraůenn vmb
zwelfftawsent marck sÿlbers. gebenn solt. welchs alles geschah
vnnd die gedachtenn Slosser kamen also an die Lantgraůen zů Důringn.
Dann Nach Cristi gebůrt Dreÿzehenhůndert vnd Im AchtvndSechtzigstn Jhar
bezaltn die Lantgraůen zů Důringn die zweÿ Slosserr Wassenbůrg
Schwartzennwalt, Vnnd Namen dieselbenn eÿn.

Darnach wůrdenn die Lantgraůen zů Důringenn der von Erffůrdt