Als diser Graff einstags Iagenn was geriten. kam er aůff den Bergk.
Wartpůrg hart vber Eÿsennach. Der gefiel Im ser wol das er die spitzenn
des gebÿrgs Innen. vnd zů einem Slos wol geschickt was. Doch misfiel ÿm
das das Schlos Mittelsteÿn so nahent darbeÿ lag. vnd das der Berg denselben
herrenn aůch behort. Aber wie dem so feÿrt er nicht. Sůndern lies zwů
hůltzern bevestigůng aůfslagenn. vnd zcog mit gewalt daraůff Ditzs
widersprachen die hernn von Mÿttelsteÿn den er anntwort. das der Berg
der kirchenn zů Meintz wer. von der er damit belehnt wer. Also wart
beden tailn ein tag fůr die Lantschafft ernent. Daraůff Vrtail vnd recht
gab. das Graff Lůdwig selb zwolfft mit dem aÿdt den berg behalten mocht.
Also lies Graff Ludwig der erden seins Landts vberflůssiglichen beÿ der
nacht daraůff fůrn. Vnd als er selb zwolfft hinaůff gangenn was. zcogenn
sie ÿre schwert aůs stiessenn sie in das ertrich bis in das geholtz