Da nůn des Lantgraůenn abwesens. Nach Cristi gebůrt Dreÿzehenhůndert.
Vnnd Im FůnffvnndSÿbentzigsten Jhar gedachter Bischoff Adolff gein
Erffůrdt kůmmen was. zog er des andern tags mitsambt den Graúen
vnnd herren die er beÿ ÿm hett. vnd allem seinem Folck. vnd mit den vonn
Erffůrdt vor Gebesehe. vnd legtn sich zůfeldt, In maÿnůng dasselb zůgewÿnnen. Derhalben
Lantgraff Fridrichs brůder Lantgraff Baltazar wiewol abwesens
seines brůdernn nicht feÿrt. Sůndern ein gros Folck versammelt vnd leget sich
mit seinem heer gegen ÿm aůff dem andernn tail der Vnstrůt. vnd ÿm
beÿ tag vnnd nacht ein gros Folck aůs Franckenn. Hessen. vnd Bůchenn.
Also machet Lanntgraff Baltazar eÿlendt eÿn Brůcken vber die
Vnstrůt. mit dem Bischoff zůstreitenn. Welchs ÿm schrifftlich von seinem
brůder Lantgraff Fridrich verboten wart. vor seiner ankůnfft,
mit dem Bischoff nicht zůthůn. Derhalben Lantgraff Baltazar ser vnmůtig was.