Gar kůrtz darnach kam Lantgraff Fridrich aůs dem OsterLanndt. vnd
bracht ein ser gros heer. vnd leget sich vor Erffůrdt hinder Sant Ciriax
Berck hett in seinem heer Dreÿsig taůsent man. Vnd lag achzehen wochen
zůfeldt. vnd sein heer het speÿs vnnd lifferůng gnůg. aůs dem Lanndt zů
Důringenn. Da verderbten sie der vonn Erffůrdt gericht vnd dorffer
zůgrůndt, zůbrachen die kirchen. verkaůfften die glockenn. die Bůcher
kelch. vnnd mesgewandt, Verderbtn ÿn ÿr Weingartn. Grůben aůch als
etlich Cronicka haltenn. ÿn die Bleÿen roren aůs. die In das Wasser
aůff Sant Petersberg trůg. Ranten teglich zů Erffůrdt in die
thor vnnd slůgen da Ritter. So důrst der Bischoff von Meintz
nicht aus Erffůrdt. Derhalben er wider den Rath daselbst ser bewegt
wart, das sie nach ym gesandt hettn. vnd ÿm grosse sachen enboten. der er kaine
in warheit erfandt Darnach kam der Romisch kaÿser karrll der Viert
mitsambt der Romischen kaÿserin vnd seinem Sůn Wentzeslaw