Romischer vnnd der Behemen Konig mit grossem Folck zů disem
Lantgraůenn in sein heer vor Erffůrdt, Also ranten die Behemen zů
Erffůrdt in die thor vnd fingn des Bischoffs vnd der von Erffůrdt lewth.
Ir wůrden aůch ein tail gefangen. Darnach teÿdingt der
Romisch kaÿser ein frid zwischen dem Bischof. den Lanntgraůen vnd der
Stat Erffůrdt. Aber mit grossem schadenn der von Erffůrdt die
dann [lies oder ergänze: den] Lantgraůen ein vberschwencklich gros geldt můsten geben. Darnach
zog das heer dem Graůen von gleichn vor Tůnna vnd verderbtenn ÿm
alle sein dorffer vnd gericht. Vnnd als das gescheen was zůreÿt das heer
vnd zog ein ÿeder wider heÿm.

Nach Cristi gebůrt Dreÿ zehenhůndert vnd Im Sÿbenvnd Sibentzigstn Ihar
tailtenn sich die dreÿ Lanntgraůen zů Důringn gebrůdere. Also
behielt diser Lantgraff Fridrich der gestreng. Landsberg vnnd das
Osterlandt. Lantgraff Wilhelm Meÿssenn. Vnd lantgraf Baltazar
Důringn mit dem ort zů Franckenn.