Aüch ein tochter Anna. Die dem hertzogenn Růdolff von Sachssen
vermehelt wart. Nach diser Erstenn Frawen tot, nam
er Frawen Agnesenn hertzogÿnn zú Sachssen. nachgelassene witwe
hertzog Fridrichs vonn Sachssenn seins aÿdams Swester Vnd
het mit diser Fůrstÿn gar ein Fůrstliche hochzeit zů Sangerhawsenn
Nach Cristi gebürt. Vierzehenhůndert Vnnd Im Viertenn Jharr.
hett aber kein kinder mit ÿr.

Diser Fůrst ist in seiner Jügent vonn seinem brüder Lantgraůen Fridrich
dem gestrengen in das Voÿtlandt geschickt wordenn dasselbig vonn den
rawbern zůreÿnigen. Welchs er menlichenn aúsricht vnnd
verbracht. Vnnd offt gantze nacht vngeslaffen in den holtzern lag. darInnen
er vil vbelteter ergreiff, die er aůch an gnad lies mit dem strick richten.
Lies aůch die Edellewth enthawbtenn. Vnd ÿr Slosser zůbrechenn.