Beÿ diser zeit wart Lanntgraff Herman von hessen důrch hertzog Otto
von Braůnsweig die Graůen vonn zigenhaÿn. vnd die Sterner geselschafft ser
beschedigt vnnd bedrangt, Inn welcher geselschafft vil herren Ritter vnnd
knecht warn. Welcher hawbtman was hertzog Otto von Braůnsweig. dann nachdem
ÿm der Lantgraff von hessen zů mechtig was. Nam er Im fůr. yn so er kůnt
zůůertreibenn. vnd das Landt zů hessenn an sich zůbringn. Aůch warn noch etliche mer
hawbtlewt diser geselschafft. Nemlich ainer gnant er hans vonn heringen
Ritter. Vnd wurden gnant die Sterner von dem stern. den sie alle an Irn
claidern trůgen. Vnd benanter von heringn fůrt den stern vmb an Reÿn. In die
wetraw. In Bůchen, In Francken. In Westphaln. vnnd In Sachssenn. das ir wol
zweÿtawsent wůrden. dem Lantgraůen von hessenn daraůff baldt entsagtenn
vnd Im sein Landt mit brant vnd nam allenthalben verderbten Derhalben hertzog
Otto von Braůnsweig am Landt zů hessen, zů sterckůng seins fůrnemens ein ser Vest
Slos wider den Lantgraůen aůffrichtet. Mit Namen Sichelnsteÿn.