gein Crewtzberg dem Lantgraüenn zü hessenn zůhelffen vnd theten dem
hertzog vonn Braůnsweig vnd andern Sternern vil vnd grossen schaden.
Nach Cristi gebůrt Dreÿzehenhůndert vnd Im dreÿvnndSÿbentzisten Jhar
bawet der Lanntgraff zů hessen aůch ain Sloss an hertzogs Otto Landt
vnnd nant es Sensensteÿn. vnd leget sein Folck wider ÿn daraůff. vnd
geschah vil schadens vntereÿnander an baiden gnantn erstgebawtn schlossern.

Darnach zogen die zwen Lantgraůen zů Důringn vnd hessen dem hertzogen Otto
fůr sein Stat Dransfeldt die sie gar blůnderten. vnd bis an die kirchenn
aůsbrantenn.

Vondannen zogen die zwen Lantgraůen vor das Schloss Hertzberg. Welches
aines herrenn von Leÿpsberg was. vnd hofften es zůgewÿnnen. In
mitler zeit was der Eldist brůder Lanntgraff Fridrich aůff dem Ach
weg. vnnd kam in die Sterner gesellschafft, vnnd sa das sie so gros was
das er beforcht das sein brůder vnd der Lantgraff von hessen vonn ÿn
mochtenn grossen schaden entpfahen. Vnnd schickt heimlich ain reitendt
botschafft zú ÿn. vor dem hertzberg sie warnet. Also flohen sie gein
Hirsfeldt ein. Da nůn die Sterner vermeintn die baide Fůrstenn
vor dem hertzberg zůfinden. fanden sie nÿmants daůor. Vnd hetten
ÿr ziehenn vmbsúst gethan. Also můsten die Fůrstenn von
hertzberg wiewol vngeendt ablassenn.

Darnach vberfieln die Lanntgraůen eintzeln itzt disen. itzt den. aůs der
Sterner geselschafft, vnnd fingn ÿr soůil das dieselb gesellschafft
Inwendig dreÿen Jharn gar ein endt Nam. Derhalben der
Hertzog vonn Braůnsweig Frid begerdt. der ÿm aůch da er das Schloss
Sichelnsteÿn zůbrach gegeben wart.