Da frid gemacht was. gedacht Lanntgraff Baltazar das grab Cristi. vnnd
das hailig Lanndt zůbeschawen. Vnnd zcog mit zweÿ hůndert Edelmannen
nach Venedig warts, Vnnd die zal wart vnterwegen also gemert. das ÿr
mer dann dreÿhůndert wůrden. Vnd als sie fůr farn hettenn die
Insell Cÿclades. vnd die besorgliche Golff des mittel mers. Vnnd In Cÿpern
kůmmen warnn. vernamen sie wider den Sůldan von Halapia. mit eÿner
vnzelichen schar der Saracenen die Insell Cÿpern zůgewÿnnen kůmmen wer.
Also fůgten sie sich zů dem konig vonn Cÿpern der die zeit in der Stat
Nicosa was. Vonn dem sie mit grossen Fraiden vnd Frolockůng entpfangen
wůrdenn. wann er erkant die Tewtzsch Nacion ser streitbar sein. Vnd
wart nicht geharret vnd verweilt. Sůndern der konig versammelt sich
mit seinem Folck. vnnd zcog aůff das vertrawen gotes dem Soldan entgegen
Als sie nůn zůsammen warn kůmmen. geschah ein grosser streÿt.