Lanntgraff herman vonn hessen vnaÿnig. Darůmb das genanter
Lantgraff die Bischofflich Pfaffheit vnd gaistlickait Inn hessenn. vnnd
zůůor die Thůmherrenn zů Frixlar ser vnd vilfaltiglichenn beschwert.
Derhalben der Bischoff vnnd hertzog Otto von Braůnsweig sich
zůsammen verbůnden. wider den Lantgraff zůziehenn. Nachdem sie
sich aber vor dem Lantgraůen Baltazar entsatzten. baten sie ÿn.
das er ÿn zů solchem krieg wolt helffenn. Nůn hett der
Lanntgraff zů Důringen wider den von hessenn aůch etlich grosse
vrsachen vnd zům tail aůch von der erlieden kost in der Sterner krieg
Aůch das er die vonn Cassell. hett vonn seinet wegen getot. Vnd das er
den Steten die verbůntnÿs brieff wider nam. Darůmb zogenn
die zwen Fůrstenn der Ertz Bischoff von Meintz. vnd Hertzog Otto.
vber den Lantgraůen zů hessen. vnd branten ÿm sein Stet aúss.

Als diss Lantgraff Baltazar sah. entsagt er dem Lantgraůen vonn
hessenn aůch vnd zog vor Eschin wege. Vnnd nachdem die von Eschinwege
besorgtenn. Wo sie sich nicht gebenn so mochten der Bischoff von
Meintz vnd der Hertzog von Braůnsweig sie wie die andern aůsbrennen.
derhalbenn liessen sie den Lantgraůen Baltazar ein. vnd hůldetn ÿm.

Diser Lantgraff nach desselbenn tags, rant er vor Süntra. Da wart er
aůch eingelassenn. Vnd sie schwůrnn ÿm aůch wie die von Eschinwege.

Darnach zog Lantgraff Baltazar zů den andern zweÿen Fůrstenn.
vnnd gewůnnen. Gůtensberg, Nÿdinsteÿn. Melsingen vnnd
Rotenberg. Welche sie doch entlich in der Richtůng alle wider gabenn.

Aber Lanntgraff Baltazar behielt fůr sein kost vnnd zerůng die
er Im Sterner krieg gethann hett Eschinwege vnd Suntra.