fůr ÿn aůff vnnd ab. vnd kam an das fenster. da er in dÿ Sal sah. die
zů derselbenn zeit hart am fels hinflos. vnd in dem sah er seiner knecht
einen mit seinem weissen pferd der Schwan genant. in das wasser schwemmen. vnd
gedacht es geschee aús ordnůng Gotes vnd Sant Vlrichs vorbit. Derhalben
er sein claider aůsbreitet vnd schnelliglich aůs dem fenster in die Sal
sprang. Den aůch sein knecht bald ergreiff mit ÿm vberschwemmet. vnd
vonn dem tot erloset. Daůon diser herr ist genant worden Lúdwig
der Springerr.

Darnach kam diser Graff gein Sangerhawsen. danckt Got vnd Sannt
Vlrich. vnnd bawet in Sant Vlrichs Ere. ein ser schone kirchen. An
welcher eingang diser Vers gehawen ist. Sůscipe sancte domům
qůam vinctůs compede foůi [lies: vovi]. Das ist. O dů lieber hailig Nÿm an
das haws das ich dir in meinem gefencknůs gelobt hab.