Nachdem nůn der Almechtig nÿmants verdamnůs. Sůnder aller menschen haÿl vnnd
selickait begert. fordert er ÿn wider důrch sein Frawen die ÿn zů einem
schweren fall gebracht hett. zům weg der ewigenn selickaÿt. Dann
sie bat ÿn am hailigen CharFreitag. zú gast. vnd setzt ÿm fůr. die allerkostlichste
essenn von Fleisch gekocht. Dess er ser erschrack vnd sprach. Es
wer gar vnzimlich. solche speÿs an dem tag zůessen daran Got Vnnser
erloser geliden hett. Darauff die Greůÿn. Warůmb seÿnt wir denn so
blindt das wir die hefftige bandt des bosen feints nicht vor vns sehen.
vnd vnser selickait so gar nichts bedencken. Vnd das vns Got důrch sein
gotlich gůte zůr bůs behelt. nicht mercken wollen Derhalben sie bede
mildiglich anhůben. zůweÿnen Vnd ÿr sůnde mit grosser rew. zůbetrachten
Vnd Graff Lůdwig nam ÿm fůr von den vergenglichen gůtern. an den
armen gottes freůndt zůmachen. Schickt aůch nach Bischoff herrandt oder Steffan
von halberstat vnd nach einem seligen Apt. Giselbrecht
vnd gab ÿn beicht weis sein gemůt zůerkennen. Daraůff sie ÿm rieten
Got zů lob ein Closter in der ere der Allergebenedeÿgstenn gebererÿnn