Der herr vonn heldrůng wart vnaÿns mit den von Erffůrdt nach Cristi gebůrt
Dreÿzehenhůndert vnnd Im ViervnndNeůntzigsten Jhar vmb ainen aÿmer
weÿns. Welchen die vonn Erffůrdt dem herren von heldrůngen pflegtn zůgeben
vnd hinfůr nÿmmer wolten gebenn Dauon erwůchs zwischen ynen ein
schwerer krieg. Vnd nachdem der herr vonn heldrůngen verhofft der vonn
Erffůrdt homůt zůstraffen. entsagt er ÿn. vnd verderbt vnd verbrant ÿn Ir
dorffer. Berawbt vnnd fieng sie vnd thet ÿn vnaůssprechlichen
schadenn Vnnd wiewol die vonn Erffůrdt sich verhofftenn mechtiger zůsein
dann der herr von heldrůngen was. doch erlangt er soůil seiner herren vnd
freůndt ÿm zůhelffenn. aůs dem Landt zů Meÿssen aůs der Marck. vnd aůs Sachssen.
Das er mit gewalt nahent fůr Erffůrdt rÿt in die dorffer, vnd hett gůtes Folcks
In der Osterwochen Sechshůndert mit glen. an allen wider standt vnd gegenwer. Als
der herr von heldrůngn sein Folck hett lassenn zůreiten. Da zogen die vonn
Erffůrdt dem herren von heldrůngen aůch mit gewalt Inn sein herrschafft.
Verderbten ÿm aůch sein dorffer aůffs meÿst so sie vermochtn Schossen mit buchssen