Inn heldrůngen Vnnd theten ÿm vil schadenns. Aber vbernacht důrstenn
die vonn Erffůrdt vor heldrůngen nicht bleÿbenn. Wann Lanntgraff
Wilhelm thet dem herren vonn heldrůngen beÿstanndt wider die vonn
Erffůrdt mit mannschafft vnd zerůng, Als diss die vonn Erffůrdt
erfůrnn wůrden sie bewegt. vnd schickten ÿr Verreter aůs disem Lantgraůenn
Wilhelm sein Stete in Meÿssen zúůerbrennen. Welcher teter vil gefangen
wůrdenn. vnd dasselb bekantenn. Nach Cristi gebůrt Dreÿzehenhůndert
vnnd Im FůnffvnndNeůntzigstenn Jhar da die vonn Erffůrdt lenger dann
ein Jhar von dem herren von heldrůng gefedt warnn. vnd erkanten das
sie von ÿm zů mererm schaden mochten gebracht werden. baten sie hertzog
Fridrich vonn Sachssen ÿrn ser gnedigen Herren. mit dem herren von
heldrůng vmb ein frid zůteidingen. Welchen aůch benanter hertzog den
von Erffůrdt zůwegen bracht. vnd die Richtůng wart vnder anderm also
begriffen vnd verbrifft das die vonn Erffůrdt solten hinfůr dem herren
von heldrůng Jherlichen ainen aÿmer gůts Elsischen weÿns gebenn. Vnd
zinshafftig sein. Darzů sie ÿm aůch ein Sůmma geldes gabenn.

Nach Cristi gebůrt Dreÿzehenhůndert vnnd im SechsvndNeůntzigsten Jhar.