versammelten sich die Stete Im Lanndt zů Meÿssenn vnd clagten allen
Graůen. Herren vnd Steten des Lands zů důringenn Inn ÿrm offen brieff
Von ÿn allen besigelt vber der vonn Erffůrdt mortbrant. Derhalben aůch
diser Lantgraff Wilhelm aůsmitleÿden gegen seinen Stetenn beweget mit einem
ser grossen Folck nach vnnser lieben Frawen gebůrt tag in důringn zog vnd
den vonn Erffůrdt alle ÿr dorffer vmb die Stat gelegen verhert. blůndert vnd
verbrant. Vnd lag aůch vor Erffůrdt Sechs gantze tag zů feldt. Darnach
legt er sich beÿ keffernberg vnd lies sein Folck zůreiten. Beÿ diser
zeit kam ein gros Fewer aůs zů Erffůrdt. vnd also das gar schier die halbestadt
aůsbrant. dadůrch die von Erffůrdt ser erschreckt wůrden. Vnd sich mit
dem Lanntgraůen vertrůgen. vnd gnad begertenn.

Jmnechstenn Jar darnach der claÿnern zal Im Sÿbenden zog Lanntgraff
Wilhelm mitsambt seinem Brůder Lantgraf Fridrich fůr das Rawb Sloss
Balgenstedt daraůs ÿr vntertanen vil beschedigt warn. gewanen das vnd
zůbrachen es zůgrůndt.