Nach Cristi gebůrt dreÿzehenhůndert vnd Im Achtvnnd Neůntzigstn Jhar
kawfft diser Lanntgraff Wilhelm zů Důringn dreÿ ser Veste Schlosser
Rÿsenbůrg Im Behemerwaldt. Kolditz In Meÿssen. vnd Eÿlenbůrg Im
OsterLandt. Welche also zů der herrschafft kůmmen sein. Wiewol man
findt in vil alden Lateinischen vnnd Tewtschen Cronicken. wie
aůch In den Ersten bůchernn diser Cronicka gnůgsam vermeldůng
gescheenn. das Eÿlenbůrg etlich hůndert Jhar der Marggraůenn zů
Meÿssenn ist gewest. Vnd ist villeicht darnach von der
selbenn herrschafft, vnd dise zeit wider darzů kůmmenn.