Marie vnnd Sant Johanns des hailigen Ewangelisten ein Closter an ainem
beqúemen ort zůbawen. vnd sich dareÿn in gotlichen dinst zúgeben dem der
Graff also thet vnd aůff vleissig beforschůng sich von den pawrn belernt.
wie das zweÿ licht beÿ eines topffers haws Reÿnhers genant beÿ einem Brůn
wonent alle nacht clerlichen erschÿnnen. Also gab er alle sein gůter vor
dem wald gelegen. zůsambt der Stat die von dem namen des topffers vnnd
Brůn heÿsset Reinhersbrůn. in gewalt des Apt Gÿselbrecht. vnd bawet
daselbst ein closter Sanct Benedict ordens. Vnd gab darzů die dorfferr Aldenberg.
Dinsterberg. Engelspach vnd Espefelt. vnd aller irer zůgehorůng Darnach bracht
er von hirschaw aůs Swaben Ernst den prior mit zwelff andechtigen Vetern.
die das Closter Erstlich besassen vnd seliglich aůffrichteten. Vnd am tag der
kirchweihůng zů Raÿnersborn gab diser Graff alle sein gerechtigkait
vber genante dorffer dem Closter vnd opffert aůff vnser lieben Frawen
vnd Sant Johans dem hailigen ewangelisten alle die priůilegia die sein
Vater vber den walt gehabt het. vnd zcog in den orden vnd nam ein seligs endt am tag.
Sant Johans vor der Lateinisch pfortn. nach Cristi gebůrt Taůsent hůndert vnd Im
dreÿvndzweintzigsten Jhar.

Dises Graůen Sůn bede wůrden vom Romischen kaÿser gefangen zů Teucherr Derhalben
er gein Tratmůnden kam vnd sich williglich in des kaÿsers gewalt gab sein
Sůn zůerlosen. Den aůch der kaÿser so lang gefenglich hielt. bis er
Wartbůrg in sein gewalt bracht. Darnach wart er wider vom kaÿser
gefangen. vnd sein Sůn Herman starb Im gefencknÿs aůff dem Slos hamersteÿn
vnd graf Ludwig wart nach zweÿen Jharn vnd neůn monden wider ledig vnd
setzt acht bůrgenn.