Graff Hainrich von Swartzbůrg Graff Hansen von Swartzbürg sůn
erbot sich Nach Cristi gebůrt Vierzehenhůndert vnd Im Neůntn Ihar
das Sloss Lewchtenberg wider zůlosenn vmb das geldt darůmb er
es vilbenantem Bůrger zů Erffůrdt. Hainrich von Paradis versatzt
hett. Diss versagt ÿm Lantgraff Wÿlhelm. Derhalben
er mitsambt seinem Brůder Bischoff Gerhardt zů Wůrtzbůrg.
dem Lantgraůen entsagt. Vnd Inn dem Landt zu Francken. dem Lantgraůen
angehorendt vil rawbs holt. vnd verderbten ÿn ÿr gericht vnd
dorffer vmb kobůrg Vnnd vmb die andern Slosser die sie vonn Irer
můter wegen Innen hetten. vnd teten mit rawben vnd brennen grossen schaden.
Derhalben der Lanntgraff vil Folcks gein Cobůrg leget. Vnnd Inn die
andere Slosser In Franckenn. den krieg wider die Graůen vonn
Swartzbůrg zůwenden. In welchem krieg baide tail
grossen schaden namen. an lewthen. pferden. vnnd an kost