Aůch zogenn die Lanntgraůen wieder Graůen Hainrichs von
Swartzbůrg Vater Graff Hannsen von Swartzbůrg. vnd verderbtenn ÿm
sein Herschafft. Desgleichen teten sie aůch dem Bischoff
vonn Wůrtzbůrg soůil schadens das er wart bezwůngen ein Richtůng
von den Lantgraůen zůbittenn. Vnd můst sein gefangen vmb ain
grosse summa gelds losen. Nachdem aber der Bischoff solch geldt an
parschafft nicht het. hofft er es zůerlangn důrch schatzůng seiner Stete
welche sich solcher stewr werten. vmb das solcher krieg von den von
Schwartzbůrg. vnnd nicht von des Stifftswegen sich erhaben hett.