Darüber hůb sich ein Newer krieg zwischenn dem Bischoff von wůrtzbürg
vnnd seinen Steten. Vnnd die von wůrtzbůrg trÿben die pfaffenn aůs.
vnd Namen ÿn Ir gůter. zogen aůch aůs vnd blůndertn die kirchen pfarhofe
vnd Closter. Ain mal warn sie getzogen vor eÿn Starcken kirchoff
da versammelten sich zwen thůmherren mit Irer Freůntschafft, vnnd
ranten die vonn Wůrtzbůrg an. vnd machtenn sie flůchtig. Vnd erslůgen
Ÿr wol zweÿtawsent. Also zogenn sie aůch gein Wůrtzbůrg. Slůgen
vil Burgern ÿr hawbt ab. Vnnd liessen die mawern nidderbrechenn.
Damit wart der Bischoff vonn wůrtzbůrg seiner Stete wider mechtig
Vnnd zog in die Stat Wůrtzbůrg mit triúmph. nicht zům thorr
Sůndern da die mawr geoffent wass.