Als diser Fürst ErtzBischoff zů Magdebůrg erwelt was. Vnd mit seiner Ritterschafft,
vnd seinen vnderthanen ein froliche Fasnacht zů kalbe verhofft zůhabenn.
wart die frolockůng baldt in clag gewandt. Wann gemeiniglich das
letzt tail der fraiden ist laid vnnd clag. Darůmb begab sich beÿ der
nacht da sie am frolichstenn warn. vnd aůff dem Rathaws dantzten. kam
eÿlendt ein geschreÿ. wie hart daneben fewr wer aůskůmmen. deshalb
ein grosser aůfflawf wart vnd gedreng. Wann ÿderman wer gern der Erst
danÿden gewest. Vnd diss gedreng wart so gros das etliche zů den fenstern
hinab arm vnd beÿn entzweÿ fieln. Also ergreiff der Bischoff aine vom
Adell ein weibsbild. mit der er zů der Stigenn lieff des Rathaws. Vnnd
vnůersehen fiel er mit der Stigenn nider. Da er selb drit an der Frawenn
schadenn tot blÿb. Vnd wart mit grosser clag gein Magdebůrg gefůrt. vnd In dem
Thům begraben. Nach Cristi gebůrt Dreÿzehenhůndert vnd Im ain vndachtzigstn Jhar.