Diser Lanntgraff George des ersten Cůrfůrstn Hertzog Fridrichs Brüder
ein schoner Jůnger Fůrst beÿ zweintzig Jharn wart von seinen brůdernn In
das taÿl des Francken Lands ÿn zůgehorendt. der hůssenn eÿnfal zůůersehenn.
geschickt dasselb zůbeschůtzen. das er aůch vleissiglich wiewol er Iůng
was. verbracht. Derhalben aůch disen Fůrsten die ketzer also ser
forchteten. das sie das Gepirg. VoitLanndt. Bamberg. Nůrmberg. Egra
vnnd elnbogogen důrch zogen. sich mit nicht dorfften verwegenn. In das
taÿl zůziehen. das er Innen hett. oder ÿmants schadenn thůn. vnnd er
wer anzweiúel ein berůffener herr wordenn. wo er hett sollen lenger
lebenn. Dann er was ein kůner fraidiger Herr. zů dem alles Landt grosse
hoffnůng hett. Als er aber seinen swachen leib zů ser můhet wart
er aůs verborgenem vrtail gottes mit vnzeitlichen tot vorkůmmen. Vnnd
starb zů Cobůrg. da sein eingeweid in der Capellen. Vnd der leib als er
begert. zů der pforten Im Closter begraben wart. Nach Cristi gebůrt
Vierzehenhůndert. vnnd Im Ersten Jharr.