Dÿweil was Hertzog Fridrich beÿ dem Romischen kaÿser Sigmündt zů Nürmberg
Derhalben Lanntgraff Wilhelm gein Leiptzk zog daselbst ander hůlff wider
die ketzer zůerharren. Nůn trosteten sich die ketzer ÿrer menig. Vnnd
zogenn vber die Elb vnnd Milda hin vnd wider. vnd legtenn sich vor Grÿm.
Also wůrdenn etliche die beÿ dem Lantgraůenn Wilhelm zů Leÿptzk
lagenn. der ketzer gewar. die aůff die fůttrůng gezogen warnn. Vnnd
zogen aůs dieselben zůůersúchen zůmalh vnuorsichtiglichen. Darůmb flohenn
die ketzer zů der Wagenbůrg. Den sie nach eÿlten. meÿnendt es wern ÿr
Fůtterwegen, Also wendtenn sich die ketzer. vnd mit ainem andern
hawffen. ÿn aůff die seÿten kamen. Vnnd als sie die schir gar vmbringt.
hettenn. můsten die Lanntgrafische streitenn. Als sich nůn die hůssen
merten vermeinten etlich zúfliehen. Aber blieben leÿder tot. Vnnd
Nemlich herr Dittrich vonn witzleben. Herr George vonn Wangenheÿm vnd
her Fridrich Vitzthůmb Rittere. mit vil andernn mere.