Sowart Georg vonn Witzlewben der das Panÿr fürt mit andern hündertn
vnnd mer gefangenn. Důrch diesen Sÿg wůrden die hůssen so vbermůtig
das sie darnach ÿm Lanndt hin vnd wieder an alle sorg zogenn.
vnd schaden teten. Dann Lantgraff Wilhelm was ÿn zůswach. vnd dorfft
seinem vngeůbten Folck nicht glawben wider sie zůstreitenn.

Also zogen sie gein Aldenbůrg. Welche Stat ser vbell verwardt was. Derhalben
die Edeln vnd Bůrger das Slos einnamen. vnd liessen die Stat ledig ligenn.
doch wol gespeÿst. Dareÿn sich die ketzer legtenn. Vnd als sie nach zweÿenn
tagen alle speÿs verzert hetten. branten sie die Stat aůs. vnd zogenn vor
Plawen. das sie gewůnnen. vnd als sie beÿ Fůnffhůndert menschen erslagn
hetten. zůnten sie von hasses wegen desselbigen herren Stat vnnd Slos an.
vnd zogenn heÿmwarts.

Ertzelt vbel beweget disen Lantgraůen so ser das er der frembden hůlff nicht wolt
erwarten. Sůndern mit den seinen aůs Leÿptzk den kertzern [lies: ketzern] nacheÿlt. vnd
fandt sie in der Enge des gepirgs an ordnůng ziehenn. Also greiff er sie an. wart
Sÿghafft, vnd bracht gar schier den gantzen Rawb herwiederr. Aůff das er
aber die Stat Aldenbůrg wider aůffbrecht gab er den Bůrgern zehen Iherige
Freihait lies die mawrn vnd graben bessern. Diser Fůrst hat aůch aÿn
halben thůmb aůff dem Slos zůAldenbůrg In Sant Georgn ere gestifftet
vnd loblichen versehenn.