Die Lateinisch Cronicka vom Lant zů Důringen helt also das nach cristi
gebůrt Im achtvnndzweintzigsten Jhar. vnter dem kaÿser Tyberiůs
die Sachssen die in Engellandt vnd Friesen wonhafftig sich erhabenn.
vnnd an die endt aůff dem Meer in schiffen kamen da itzt Lůbeck.
vnd Rostock ligenn. dohin von Irem konig geschickt mit vil hewptlewten
als er erfarnn hett. das die Důringen diezeit in denselben Landen
wonhafft keÿn konig hetten. Als nůn die Sachssenn
dahin kamen. erfrawten sich die Důringenn ÿrer zůkůnfft gar
nichts Sundern steltenn sich zů der gegenwer. vnd strÿten mit ÿn
Nachdem nůn baider saitenn vil Folcks tot blÿb. behieltenn entlich
die Sachssen das feldt vnd Landt. vnd gewanen den Důringen Ir
Lanndt an. Derhalbenn etlich důring beÿ den Sachssen
blÿbenn. Vnnd gabenn sich Inn ÿr Obirkaÿt.