einem hirschen den er geschossenn het. schnelliglich nach. das ÿn sein
diener nicht erfolgen mochten. vnd ÿn In dem walt verlorn. Also wart er
verIrret. in dem walt. Aůff den abent da er nÿmants fandt vnd aúch
vonn nÿmants gefůnden wart. ser spot. do hort er ain Waltschmidt sein
hantwerck gebraůchen. vnd die hemer clingen. des hůttlen er
sich nehet. vmb herberig bittendt. Als er aber gefragt wart. seines standts
Sprach er ich bin ein Jheger des Lantgraůen Lůdwigs. demder schmidt
Pfůÿ des torichten vnnd vnedeln Fůrsten seinen namen solt man nÿmmer
nennen. Wo nicht wasser den můndt sopaldt zůspůlen. dich wil ich gern
herberigen diese nacht. Nicht vmb seiner willen. Sůndern Sir [lies: dir] zúgůt.
vnnd zů willen. Aůff das vonn dir von den wilden thirn kein schad
widerfhare Aber dů můst fůr gůt nemen. wass ich als ein armerr
schmid vermag. Hie ist ein klaÿn hewslen. zeůg ein dein pferdt. vnnd nÿm
fůr gůt das gras. Wann der haber ist tewr Als er nůn eingezogen
was. vnnd sein pferdt versorgt hett. lůde er ÿn zů dem tisch. Nachdem er
aber der bewrischen kost als vngewont nit essen mocht. tranck er ein
wenig wassers. vnnd wart zů bet geweist. Nůn pflage der schmidt
grosser arbeit tag vnnd nacht. vnd fieng an zůslahen aůff den ambos
vnnd zů allen streichenn den Lantgraůen zůůerflůchen. Sprechendt. Dise
arbeit hab ich aůs deiner lassickait. Ich was reich. vnnd dein
Rethe haben mir das mein mit gewalt genůmmen. Vnd der Adel hat mich
vnntergedrůckt. vnnd sprach zů dem Sůn den er beÿ ÿm het. Schon keins
hammers. wann ich zů Got vertrawe in diser nacht ein Eÿssern
Lanntgraůen zůmachen. vnd nach allen schlegen fieng er wider ann dem
Lanntgraůen zůflůchen aůff dise maÿnůng. Ach dů weÿbischer vnnd
weicher fůrst wirt eÿsern. wie lang schlefstů. wache doch ains aůff.
Nÿm war das Lanndt ist mit rawbernn erfůllet. Witwen vnnd weÿsen
werden verdrůckt. vnd die gerechtigkait wirt vmb geldt verkaůfft. Diser
verfůrt dich mit worten. diser helt das dein mit gewalt Innen Diser
verkeret dich mit hinderlisten. vnd wirt von deinen gůtern Reich Der
verkewfft das dein heimlichen. Diser stilt dir das dein. Der betreůfft
dich mit deinem aÿgen schmaltz. vnd wettet dir das dein ab. damit
Verdirbestů Also nant er alle sein ratgebenn vnd itzlichen beÿ seinem
namen. vnd saget alles. das da Irr gieng. in dem Landt. Darůmb stee
aůff, wirt eÿssernn. vnnd leg vonn dir die lassickait ehr das dů ein
Bettler wirdest. Ader stirb doch eines bosenn tots. ehr das Folck gar
verderbe. Villeicht gibt got den armen lewthen ein bessern
herren. denn dů bist. Diss vnnd anders vil mer vertzelt er die gantze
nacht nacheinanderr.