Des morgens ser frw beleitet der schmidt den Lanntgraůen aůff einenn
vnbekanten weg. Also gesegent ÿn der Fůrst vnnd sprach. Wÿss
fůr war das dů aůff dise nacht. wie dů begert hast ein eÿsern
Lanntgraůen solt geschmÿtt habenn. mit dem rÿeth er gein Wartbůrgk.
vnnd sein gemůt wart beweget vnnd verwandelt. Dann er wart
wider vnnd entgegen dem bosenn fůrnemen seiner Rethe. vnd wolt
ÿn nÿmmer folgen. Er verfolget die vngehorsamenn. vnd die wider
spennige důrchachtet er mit gewalt. Deshalb er von dem
meÿstenn taÿl seÿnes Adels gehast wart. Die aůch ein Bůndt vber
ÿn machten.