Darnach versammelt diser Fůrst sein Bůrger vnnd Bawrn seinem vngehorsamenn
Adell zů widersteen. Wann der has wart gemert. vnd sie versammelten
sich wider den Fůrstenn. nit fern vonn Freÿbůrg. Vnd geschah ein streÿt.
vnnd aůs gotlichem verhencknÿs gesÿget der Fůrst. Erschlůg ÿr vil. vnnd
fieng ir noch mer. Als er nún die aůff das gnant Schlos bracht. Sprach
er zů ÿn. yr trewlosen vnnd meineÿdigen menner nit wirdig Edell gnant.
zů werden. súnder verreter vnnd wirdig des tots. Warúmb.
habt ÿr versacht mich eynen vnschůldigen vnd eůch vbergůtigen Fůrsten
also zůúersůchen vnd aůch heimlichen zů toten. Sehet itzt gleÿst mein
schwert vber ewern kopffen. vnd ir werd entphaenn den lon ewers freůels
Also fieln sie alle gestreckt aůff die erdenn. mit vil entschůldigůng
gnad zůbitenn. Da er sich aber ÿr erbarmet. antwort er ÿn mit weÿnenden
awgen. Tott ich eüch. So werd ich vngůtig genant. vnd vnbarmhertzig. Schatz
ich eůch So ist es ein schandt. vnd ein vnrům. als einem Fůrstenn seÿn
aÿgenn Lewth zůschatzenn. Las ich eůch dann Freÿ. So thů ich der
gerechtigkeit kein gnúge. Aůff das ich aber baÿden der barmhertzickait vnd.