Da der Romisch kaÿser sein schweher ain mal aůs poln widerkert. wart.
er vonn dem Lantgraůen aůff sein Schlos Freÿbůrg gefůrt. vnd beÿ seiner
schwester beherbergt Als aber der kaÿser das Schlos sah. gefiel
es ÿm nit. das ein solch Fůrstlich Schloss mit so geringenn maůrn vmbgeben
was. Derwegen der Lanntgraff zů ÿm Sprach. Ich wil in
diser nacht. ein solche mawrn darůmb machenn. Das In ganntz Doringer
Landt ÿr gleichenn nit sein mag. Vnnd zůstůndt beschicket er alle
sein Edelleůt die er in solcher zeit erlangenn mocht. stellet die
verwapent. ÿnn ÿrnn gekronten helmen gerings vmb das Schloss. vnnd itzlichem
seine knecht verwapent mit geschůtz wehr. vnnd schÿldenn vor ÿn hart
aneinander. Als nůn der kaÿser frw aůf stůndt. weÿset er ÿm
die vnnd er bekant. sich beÿ seinen tagen der mawrn gleichen nÿe
gesehenn habenn.