Diser Lantgraff was ein frůmmer tůgenthafftiger Fůrst. vnd ein grosser
hanthaber aller gaistlickait vnnd Priesterschafft Sunderlich des closters
zů Raÿnhartsborn. Welchem er Teůtlewben Topstet. vnnd vil andere
gůter aÿgent. thet seinen Landen vil gůts. vnd strafft die fridbrecher.
rawber. vnnd morderr mit grossem ernst. Derhalben ÿm die frůmmen
gůnstig. vnd die bosenn gantz wider vnd gram wůrden. Wann die bosen.
vnd vntůgentliche Edellewt. sein gerechtickait forchten vnd verkaůfften
dem Marggraůen Otto von Meÿssen alle ÿre gůterr. Wann er
war von wegen des Berckwergs zů Freiberg ser reich. Derhalbenn der
Lantgraff Ludwig sein botschafft zů Marggraff Otto zů Meÿssenn mit vleissiger
bit. das er in seinem Landt Schlosser. Stetlen. ader andere guter wider
sein willen vnd ym zů nachteÿl nit solt kaůffen. wan so er sich des nicht
enthalten wůrd. so wůrd er wiewol vngern verůrsacht sich solcher gewalt
gegen ÿm zůentladenn.