Dadůrch erhůb sich weÿter enporůng. důrch den wider spennigenn Adel vnnd
bewegten den ErtzBischoff Cůnradt vonn Meintz den Lantgraůen zů kriegenn.
Beÿ welchem ErtzBischoff vil Graůen stůnden. Nemlich aůch Graff
Erwin von gleichenn. vnd Graff Hainrich von schwartzbůrg. Aůch die von
Erffůrt Demnach der ErtzBischoff ein New schlos beÿ Velsbergk
bawet mit Namen heÿlgenberg. vnnd legt vil Folcks daraůff. die Lanndt
zů Důringen vnnd hessen daůon dem Lanntgraůen zů nachteÿl zůbeschedigen.
Vonn welchem der fůrnemst was ein Graff vonn Solms. von welchem solchs
dem Lantgraůen also hoch mÿsfiel. das er gegen des Graůen von Solms Schlos
vber. aůch ein ser fest Sloss bawet. dem ErtzBischoff vnd Graúen von Solms
zuschadenn. vnd legt aůch vil wolgerůsts Folcks daraůff. Vnd nachdem
der seinen hawbtman was ein Graff mit namen Braůn oder Brůno nennet er
das Sloss Brůnenfels. Dise Jrrůng zwischen gedachtenn Fůrsten erfůr
der kaÿser in Jtalien. vnd dieweil er sie baÿde gernn beÿ ÿm in seinem heer
gebraůcht het. schickt er seinen Sůn gein. Erffůrt mit baÿden tailn zů
schaffenn. das sie mit diser sachenn bis aůff sein ankůnfft in rwe stůnden.