Als nůn die vonn beden tailn gen Erffůrdt kůmmen warn. vnnd Inn
ainem haws beÿ vnnser lieben Frawen kirchen handelten. vnd zů. vnnd von
einander giengen. giengen die palckenn vnd treger aůff. vnd das hawss
brach also. das der maist tail in ain haimlickait fieln. Daraůs doch
vil wider geholffenn wart. Aber dennoch Fůnff Graůen blÿbenn
tot in solcher vnreÿnickeit. Nemlich Graff Hainrich von
Schwartzbůrg ain anheber der ganntzen Jrrůng. Graff Fridrich von Aldenbůrg.
Graff Gossmar von zcigenhaÿn. Graff Bůrckhart von Wartberg.
Fridrich vonn kirchberg. vnnd heringer von Meldingen. Vnd vil ander
mer. vnnd disem krieg wůrdt ein anstandt aůff dreÿ Jhar gegebenn.