Darnach als ym benante sein Erste Fraw gestorbenn was. nam er Frawen
Sophia ein hertzogÿn vonn Baÿrn. Vnd hett mit ÿr Vier Sůn.
Lanntgraff. Lúdwig. den hailigen genant. Lanntgraff Hainrich
entlich Romischer konig. Lantgraůen. Cůnradt. den erstenn hohenmaister
des Tewtschen Ordens vnd Lantgraůen herman. der Iůng ist gestorben.
Aůch zwů tochterr. Ermengard. ein Grefÿn von Anhalt.
vnd. Agnes. ein Hertzogÿnn zů Osterreich.

Dieser Lantgraff hat mit Marggraff von Meÿssen kriegt. yn aůch in etlichen
streiten in Meÿssen vberwůnden. hat sich aůch gegen
den zweÿen Ertz Bischoffen zů Meintz vnd Colnn můssen weren. die Im sein
Landt beschedigten.