Weyssennsehe. vnnd bawet wider aůff dem Berg Witkinberg. das alde Schloss.
Aber die getrewen des Lanntgraůen Graff Hainrich vonn Schwartzbůrg vnnd
Schenck Walter vonn Varÿla taÿlten sich in zwen hawffen. wiewol ir wenig
was. vberwůnden sie vnd verbranten das Slos wider. Da wart gefangenn
Graff Fridrich vonn Beichlingen der diss vbels ein vrsach wass. Vnnd Graff
hainrich vonn Stolberg. vnnd vil anndere edele vnnd vnedele. Deshalb konig
Otto nit wider in důringen dorfft zciehen. Wann er newlich darnach
abgesetzt wart. vnd der lanntgraff schwůr dem newen Romischen konig
Fridrich zů Frannckraich vnd lebet darnach fridlichen bis in sein alderr.

Diser Lanntgraff bawet das Closter Sancte Katherine aůff der
weg zů Eÿsennach do etwan das gericht gestanden was. Vnd er wart solch
Closter zůbawen důrch ain trawm vermanet. Wann ÿn daůcht wie alle die
an der Stat gelÿden hetten in scheinbarlichen claÿdern wideraůff
stůnden vnd folgten nach der můter Gotes Marie vnd der hailigenn.