Als der benant philosophůs Clingesor fůr den Fůrstenn kůmmenn was.
vnnd ains abents. beÿ den Edeln aůff der hofstat des gnantenn bůrgers.
do er das gestÿrnn mit grossem vleis anschawet. Als er aber
gebeten wart. von den vmbsteenden, das geschicht zůoffenbarnn. gab er
dise anntwort. Inn diser nacht wirt dem konig von Vngernn
ein tochter gebornn. die wirt hailig vnnd Elisabet genant. vnnd
sal dieses fůrstenn Sůn vermehelt werdenn. Von welcher
menschen hailickait alle Tewtsch Lannde erfrawet werdenn. Vnd es
geschah aůch also. Dann nach Cristi gebürt zwelffhůndert
vnd Im Sÿbenden Jhar. wart gebornn Sant Elisabet. vnd nit
Lang darnach dem hailigen Lanntgraůen Lůdwig vermehelt.