edle Fraw. Bertha eÿn verlassene witwe, herren Egewalds von Bendelewben
mit zweÿen andernn Frawen. vnd dreÿ edelnn JůnckFrawen. Nůn fůnden
sie den konig zů Bresbůrg vnd als sie ÿr botschafft geworbenn hettenn.
wůrdenn sie gewert. vnnd mit koniglichenn gaben geert. Als sie
sich. aber schickten heÿm zůzciehen wart ÿn Sant Elisabet ÿn eÿner silbern
wigen, mit seÿden. silbern vnnd gůlden stůcken bewůnden. geantwort.
die ÿn die konigÿn mit weÿnenden awgen befalh. vnd gab ÿn mit zůfůhrn
vil silbern vnnd gůlden gefes. Berlin vnd gůlden kron. schone klaÿnet.
Ring vnnd fůrgespan. mancherleÿ cleÿder, silbern gůldene vnd seÿdene
debecht. eÿn silbern Badfeslenn. vil kostlicher tůcher vnd ander hawsgerethe.
Dessgleichen vor nÿe in Důringen gesehen was. vnd darůber Tawsennt
Marck an gelde. vil grossers verheÿssendt.

Als Sannt Elisabet gein wartberg kůmmen was. wůrden die kindt
zůsammen gelegt. vnnd ein fÿgůr der hochzeit gehalden. Vnd sie wart
geantwort den edlen frawen zůerneren. bis zů den Jharenn ÿrerr
vernůfft. Als sie aber Sÿbenn Jhar alt wart. wůrd ÿr múterr
felchslichen [lies: felschlichen] von den Vngern getotet. vnd důrch die bit Sant
Elisabet Der sie die nacht erscheÿnn. als mÿldiglich zůglawbenn ist
behaldenn.