Von der Aldenn Sachssen gerechtickeit.

Die alde Sachssenn haben aüch die gerechtickait zů vnterhalten das halsgericht
gar Ernstlich gehaltenn. Darůmb list man das aÿn mal
ainer mit seinem nachbarnn. so vnaÿnig was wordenn das er ÿn zůtoten
fůrgenůmmen hett. wie er aůch gethan hab. vnd solchs dester beqůemlicher
zůůerenden hab er seinem Sůn den rock zůhaltenn geben. Also sein sie
baide darůber Vater vnnd Sůn gefangen wordenn. Vnd den Sůn so lang
Im gefencknÿs enthalten. bis er zů seinen Vierzehen Jharn kůmmen was.
vnnd mit recht mocht abgericht werdenn. Damit kam es zů solcher
redlickait das gar wenig dibereÿ vnnd ander vbell so weit Sachssenn ist.
geschah. Vnnd gar vor wenig Stetenn vnd dorffern reder. galgen.
vnd annder gericht stet. gesehen wůrdenn. Aůch findt man das die
Sachssenn In vorzeiten vonn wegen Irer grossen redlickait wider schrifft
nach pitzir gebraůcht. Sundern alle Ir hendell an all betriglickait
mit worten vnnd Volgenden werckenn. aůsgericht habenn.