Dann in Aldenn Sachssenn da kein erkentnÿs Cristi ist. wenn ein Jůnckfraw
In Ires Vaters haws. ader aber aůch ein EeFraw mit eebrůch vermackelt wirt
dieselb můs sich mit Irn aigen handen totenn. Vnd darnach verbrent man
sie. Vnnd vber das grab der vnkewscherÿn hencken sie den vnkewscher.
Ader aber die kewschen matron entblossen die vnkewscherin. bis aůff die
gůrtell. vnnd geÿsseln vnd stechenn sie aůch mit messern. vnd schickenn
sie vonn eÿnem dorff in das annder. so lang bis sie dieselben tottenn.
Weil nůn die Lanndtschafft den Got vnkůndig ist solche lieb zů der
kewschait tragenn. was zimbt dann dir mein libster Sůn. der dů
ein Cristen mensch vnnd konig bist. Darůmb schon deiner selen
vnd des grossenn Folcks deiner vnterthanenn. die alle důrch dein
vorbildt verderbenn. Von welcher aller selen dů wirst můssen
dem Almechtigenn rechnůng gebenn. Ich bit dich. du wellest
bedenckenn. wie hart der ewig Got gestrafft hat die vorige konige in
diser vntůgent schůldig. Wann dein vorfarn Celred ein Jůnckfraw
Closter Iůnckfrawenn vnreÿniger vnnd verbrecher der gaistlichen
Freiheit vnnd Priůilegien hat der Bos gaist da Inn einer herlichen
wirtschafft beÿ den seinen sas. besessenn. vnd an beicht von disem
Jhamertal genůmmen. der Doirorům vnd Berniciorům konig.
Nasreům [lies: Osredum] aůch diser vnzůcht schůldig hat der bos feÿndt so wildt
gemacht das er in seiner schonenn Jůgent sein raich mitsambt dem
Leben verlor Derwegen bitenn wir dich aúffs vleisigst. vnd
vmb Gots willenn dů wellest betrachtenn. wie vngewiss vnd hinfellig
ist gegenwertig Lebenn. Desgleichenn die Begirlickait vnd lůst des
Fleisch. damit die ewige pein gekawfft werden. Aůch wellest bedencken
wie schmeelich vnd vnerlich seÿ. bos ebenbilt dises kůrtzen lebens.
den nachkůmmen in ewickait zůlassenn. Aůs diesem hochgenantem
hailig Bischoffe Sant Bonifacij antzaigen ist leichtlich einem ÿden
aůch geringverstendigenn abzůnemen. was grosser vnnd sůnderer
tůgent die Sachssenn in vorzeiten gewesen sein. Vnnd wie Ernstlich
sie alle vbeltat gestrafft habenn. Vnnd haben aůch die
andern vnkewscherÿn die nicht des Adels sein gewesenn so ernstlich
gehandelt. das sie lieber woltenn sterben dann In solcher peÿn sein.
vnd mer frůcht in solcher weÿs gebernn. Darůber wenn in Sachssen
ein Jůnckfraw an verwilligůng Irer Freůntschafft ein man nam.
so kamen sie nicht allein nicht auff ÿr wirtschafft. Sůndernn aůch
zelten sie nicht mer fůr ÿr Můhmenn. Aůch haben die alden
Sachssenn gewonhait gehabt. wen ÿr Sůn Ader tochter aůch wenig zů
vnern genaigt vermerckt wůrden. zů ÿn also zůsprechen. Ich
meÿn dů wellest vonn mir Im stall begraben werdenn.
Die Sachssen haben aůch zů mermaln gesagt das sie von yrn Eldernn
gelernt hetten. das vil besser wer die vngehorsame vnd vngeratene kinder.
zůtotenn. dann sie zů vneren ÿrer Freůndtschafft lassen lebenn.