Von dises Konigs Frawen
vnnd kindernn.

Diser konig hat gehabt zů seinem eelichen gemahel Frawen Berta von Francken
oder Franckraich gebornn. Vnd nachdem sie ein Cristlich Fůrstÿn.
vnnd konig Edilbrecht ein haid was. wart sie disem konig mit disem beschaÿd
vertrawet. das sie solt ein gaistlichen Bischoff genant Linthart beÿ Ir
behaltenn. desterbaser Im hailigen glawben zubleiben. Also hat
diser konig mit benanter seiner Frawen. ein Sůn gehabt. Cadbaldt oder
Eadbaldt. zů Cantůarien. Vnd ein tochter Edilberg. sůst
aůch Tate genant. kongÿn zů Nordanhÿmbrenn. konigs Edwins
gemahell. Die aůch Irem herren als ein Cristliche Fůrstÿn vrsach gab.
den hailigen Cristlichen glawbenn anzůnemen. Mit welchem sie hat
zwen Sůn gehabt. Edilhim vnd Wesfrea vnd ein tochter Edilridis.